SHPALLJE VAKANCE PËR OFICER TË SHËRBIMEVE TË POLICISË GJYQËSORE NË BYRONË KOMBËTARE TË HETIMIT

 SHPALLJE VAKANCE PËR OFICER TË SHËRBIMEVE TË POLICISË GJYQËSORE NË BYRONË KOMBËTARE TË HETIMIT 

Në zbatim të Kodit të Procedurave Administrative, Kodit të Procedurës Penale, Kodit Penal, Ligjit nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”, i ndryshuar dhe  ligjit nr. 25/2019 “Për organizimin dhe funksionimin e Policisë Gjyqësore”, Byroja Kombëtare e Hetimit shpall procedurat për rekrutimin e 10 (dhjetë) pozicioneve për funksionin:

Ø  Oficer i Policisë Gjyqësore në Byronë Kombëtare të Hetimit – Kategoria 60% i G3

1. Oficerët e Sektorit të Policisë Gjyqësore pranë BKH-së gëzojnë statusin e oficerit të Policisë Gjyqësore.

2.   Gjatë ushtrimit të funksionit të tyre ata janë të pavarur nga institucioni i origjinës.

3.   Në ushtrimin e funksioneve të tyre procedurale ata drejtohen dhe kontrollohen nga prokurorët e posaçëm të Prokurorisë së Posaçme. Prokurorët e posaçëm japin urdhra dhe udhëzime hetimore detyruese për oficerët e Sektorit, të cilat ekzekutohen menjëherë dhe me përparësi nga këta oficerë, në përputhje me Kodin e Procedurës Penale dhe ligjin nr. 95/2016.

4.   Në aspektin administrativ dhe organizativ, Sektori dhe oficerët e saj janë nën varësinë dhe drejtimin e Byrosë Kombëtare të Hetimit. Zëvendësdrejtori i Byrosë Kombëtare të Hetimit është përgjegjës për funksionimin e Shërbimeve të Policisë Gjyqësore të BKH-së dhe, në këtë cilësi, ushtron drejtimin administrativ mbi veprimtarinë e përditshme të oficerëve të Sektorit. Oficerët raportojnë për çështje administrative, disiplinore apo logjistike te Zëvendësdrejtori i BKH-së dhe ndiqen nga Drejtori i BKH-së për performancën dhe vlerësimin e tyre periodik.

5.   Oficeri i Shërbimit të Policisë Gjyqësore është subjekt i Rregullores së Disiplinës dhe Kodit të Etikës, miratuar me Urdhrin nr. 116, datë 28.04.2021 të Drejtuesit të Prokurorisë së Posaçme.

v Kanë të drejtë të aplikojnë për këtë procedurë vetëm punonjësit që gëzojnë statusin e oficerit të policisë gjyqësore dhe nga institucionet e përcaktuara më sipër!

1.Rekrutimi dhe emërimi në Sektorin e Shërbimeve të Policisë Gjyqësore bëhet nëpërmjet një procesi të hapur dhe transparent, në përputhje me nenin 7 dhe kreun VIII të ligjit nr. 95/2016. Kandidatët duhet të plotësojnë kushtet e sigurisë të parashikuara në nenin 6 dhe kriteret e kualifikimit sipas nenit 32 të ligjit. Përfundimi i programit të trajnimit sipas funksionit është i detyrueshëm.

2.   Njoftimi për shpalljen e garës do të publikohet në faqen zyrtare të internetit të Byrosë Kombëtare të Hetimit. Procesi i rekrutimit do të administrohet nga BKH, në bashkëpunim me Prokurorinë e Posaçme, duke siguruar vlerësimin meritokratik të kandidatëve në bazë të kualifikimeve dhe integritetit të tyre.

3.   E drejta për të aplikuar u takon Oficerëve të Policisë Gjyqësore të shtetit (përfshirë ata të strukturave të specializuara të Policisë së Shtetit si drejtoritë kundër krimit të organizuar, krimit ekonomik, trafikimit të narkotikëve etj.), si dhe oficerëve nga institucione të tjera me funksione Policie Gjyqësore, të cilët plotësojnë kriteret ligjore dhe profesionale për këtë pozicion. Kandidatët duhet të kenë përvojën përkatëse në hetimin e veprave penale serioze dhe një reputacion të lartë profesional e moral.

4.   Pas përfundimit me sukses të procesit të përzgjedhjes, kandidatët e shpallur fitues emërohen si oficerë të Policisë Gjyqësore në shërbim pranë BKH-së me mandat 5 (pesë) vjeçar. Gjatë kësaj periudhe pesëvjeçare, oficerët e emëruar pranë Sektorit konsiderohen të pavarur nga institucionet prej të cilave vijnë dhe ushtrojnë detyrën ekskluzivisht në funksion të Byrosë Kombëtare të Hetimit dhe Prokurorisë së Posaçme. Në përfundim të mandatit pesëvjeçar, oficerët gëzojnë të drejtën të kthehen në pozicionet e mëparshme në institucionet e tyre të origjinës, ose të emërohen në pozicione të një niveli të barasvlershëm, sipas parashikimeve të ligjit.

5.   Oficeri i Shërbimit të Policisë Gjyqësore rikthehet në pozicionin e mëparshëm të punës në institucionin nga i cili është rekrutuar edhe para përfundimit të mandatit 5- vjeçar, me urdhër të Drejtuesit të Prokurorisë së Posaçme në rastet e mëposhtme;

a.   Në rastet kur Drejtuesi i Prokurorisë së Posaçme, kryesisht ose mbi propozim të Drejtorit të BKH, vlerëson se pozicioni i mbajtur nga OPGJ nuk është më i domosdoshëm për nevojat funksionale/organizative të strukturës;

b.   Kur Oficeri i Policisë Gjyqësore paraqet dorëheqje të motivuar me shkrim. Dorëheqja bëhet efektive pas miratimit me urdhër dhe, sipas rastit, pas përfundimit të një periudhe tranzitore për dorëzimin e detyrës;

c.   Në rastet kur  Oficeri i Policisë Gjyqësore është në pamundësi për të ushtruar detyrën, për shkaqe objektive, për një periudhë më shumë se një muaj, pa përfshirë periudhën e lejes vjetore. (p.sh. paaftësi e verifikuar nga mjeku mungesë e zgjatur për shkaqe të pakapërcyeshme, humbje ose mos rinovim i certifikatës së sigurisë, ndryshim statusi ligjor që e bën të papërshtatshëm për detyrë);

d.   Kur Oficeri i Shërbimeve të Policisë Gjyqësore vlerësohet “Shumë dobët” në aspektin administrativ dhe/ose procedural për një periudhë vlerësimi të plotë.

e.   Kur Oficeri i Shërbimeve të Policisë Gjyqësore vlerësohet “Dobët” në dy vlerësime të njëpasnjëshme;

f.    Kur konstatohet shkelje e rëndë e detyrimeve të integritetit (p.sh. refuzimi i heqjes dorë nga pritshmëria e privatësisë sipas shtojcave përkatëse, mosdeklarimi i llogarive financiare, refuzimi i kontrolleve të autorizuara), humbje e besueshmërisë ose rezultate skualifikuese nga verifikimet e integritetit/poligrafit sipas kërkesës së ligjit, rrethana të cilat mund të përbëjnë shkak për fillimin e një hetimi të brendshëm administrativ ose penal.

g.   Kur Oficeri i Shërbimeve të Policisë Gjyqësore ka nxjerrë, me dashje ose nga pakujdesia, informacion sensitiv të hetimeve ose ka kryer shkelje të tjera të rënda të disiplinës/etikës, në përputhje me rregullat në fuqi;

h.   Kur ndaj Oficerit të Shërbimeve të Policisë Gjyqësore fillon procedim penal për vepra që komprometojnë ushtrimin e detyrës, ose kur ndaj tij urdhërohen masa sigurimi që e bëjnë të pamundur vazhdimin e detyrës;

i.    Kur rezulton se Oficeri i Shërbimeve të Policisë Gjyqësore nuk i përmbush më kushtet ligjore të emërimit (p.sh. humbja e së drejtës për të ushtruar funksionin, ndalim ligjor, konflikt interesi i pakapërcyeshëm, papajtueshmëri e konstatuar);

j.    Kur, për shkak të ristrukturimeve të miratuara ose mirëadministrimit  të ngarkesës së punës, pozicioni suprimohet ose reduktohet.

6.   Para emërimit, kandidatët plotësojnë kushtet e sigurisë dhe firmosin deklaratat përkatëse të heqjes dorë nga pritshmëritë e privatësisë në telekomunikime dhe llogaritë financiare, sipas ligjit. Në funksion të këtij procesi kandidati për Oficer i Shërbimeve të Policisë Gjyqësore mund ti nënshtrohet testit të poligrafit si pjesë e vlerësimit të integritetit dhe kushteve të sigurisë, me pëlqimin e tij me shkrim. Ky test mund të kërkohet edhe në vazhdimësi të mandatit, me propozim të Drejtorit të BKH-së dhe pëlqim të Drejtuesit të Prokurorisë së Posaçme, kur ka indicie të arsyeshme për cenim integriteti/rrezik sigurie. Zbatimi i testit respekton legjislacionin për mbrojtjen e të dhënave dhe të drejtave themelore.

7.   Gjatë mandatit oficerët e policisë gjyqësore të Sektorit, paguhen nga BKH, në masën e përcaktuar nga ligji 95/2016  “Për organizimin dhe funksionimin e institucioneve për të luftuar korrupsionin dhe krimin e organizuar”, i ndryshuar.

a.      Të ketë të paktën 5 (pesë) vjet eksperiencë pune.

b.     Të ketë njohuri, aftësi organizative dhe menaxheriale në hetimin e krimit të organizuar, krimit ekonomik dhe financiar, krimit kibernetik, antiterrorit, në fushën e menaxhimit të kufirit dhe migracionit, kontrollit të brendshëm të agjencive ligjzbatuese, fushën e doganave, tatimeve si edhe sektorëve të tjerë përkatës, duke njohur në thellësi kërkesat ligjore e procedurale që kanë të bëjnë me identifikimin, zbulimin dhe hetimin e veprave penale.

c.      Të ketë kryer trajnime që lidhen me fushat specifike të hetimit, objekt i veprimtarisë dhe misionit të institucioneve prej nga vijnë dhe të prezantojnë të paktën 3 çështje nga 3 vitet e fundit, me qëllimin për të nxjerr në pah aftësitë profesionale dhe organizative.

d.     Të plotësojë kushtet e sigurisë para caktimit në detyrë ose emërimit, siç është kontrolli i verifikimit të pasurisë dhe të figurës, në zbatim të ligjit 95/2016;

e.      Të japë pëlqimin për kontrollin periodik të llogarive të tij bankare dhe të telekomunikimeve vetjake, për të cilën kandidati plotëson dhe nënshkruan një deklaratë me shkrim, sipas shtojcave B2 dhe B3  dhe shtojca C të Ligjit nr.95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”;

f.      Aksesi në databazën (niveli) e institucionit të rekrutimit, administrimi, mënyrat e përdorimit dhe kushtet e sigurisë të transmetimit të informacionit nga oficeri i shërbimeve të policisë gjyqësore do të përcaktohen në marrëveshjen e bashkëpunimit që do të nënshkruhet midis Byrosë Kombëtare të Hetimit dhe institucionit prej nga do të rekrutohet oficeri.

g.     Të jetë i pajisur me çertifikatë sigurie.

h.     Të ketë aftësi komunikuese dhe të punës në grup.

i.       Të njohë parimet e mbikëqyrjes, trajnimit dhe vlerësimit të performancës.

j.       Të njohë bazën ligjore, parimet dhe standardet ndërkombëtare të të drejtave të njeriut.

k.     Të mos ketë masë disiplinore, e cila është ende në fuqi sipas legjislacionit në momentin e aplikimit;

l.       Të ketë 3 vlerësime pune “shumë mirë” gjatë 5 viteve të fundit, për aftësitë e tij profesionale, etike dhe integritetin moral.

Kandidatët duhet të dorëzojnë pranë Byrosë Kombëtare të Hetimit, institucioni ku ndodhet pozicioni për të cilin ata dëshirojnë të aplikojnë, dokumentet si më poshtë:

a.      Kërkesë për aplikim; ( http://spak.gov.al/wp-content/uploads/2025/10/Formular-i-aplikimit-aneks-1-OPGJ-BKH.doc )

b.     Formularët e firmosur sipas pikës 1 të nenit 6, të Ligjit nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”, i ndryshuar;

c.      Jetëshkrimi;

d.     Fotokopje të diplomës dhe listës së notave (përfshirë edhe Diplomën Bachelor);

e.      Fotokopje të librezës së punës (të gjitha faqet që vërtetojnë eksperiencën në punë);

f.      Fotokopje të Kartës së Identitetit (ID);

g.     Vlerësimin e fundit nga eprori direkt;

h.     Vërtetim nga institucioni që nuk ka masë disiplinore në fuqi;

i.       Vërtetim të gjendjes shëndetësore;

j.       Vetëdeklarim të gjendjes gjyqësore;

k.     Formular Vetëdeklarimi për zbatimin e Ligjit Nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike” ; ( http://spak.gov.al/wp-content/uploads/2025/10/formular_vetedeklarimi_per_garantimin_e_integritetit_te_personave_qe_zgjidhen_emerohen_ose_ushtrojne_funksione_publike_1109.pdf  )

l.       Vërtetim nga Prokuroria e Rrethit Gjyqësor ku banon, që nuk ka çështje në ngarkim të tij/saj;

m.   Vërtetim nga Gjykata e Shkallës së Parë ku banon, që nuk ka çështje në ngarkim të tij/saj;

n.     Vërtetim nga Zyra Përmbarimore;

o.    Çdo dokumentacion tjetër që vërteton trajnimet, kualifikimet, arsimim shtesë, vlerësimet pozitive apo të tjera të përmendura në jetëshkrimin tuaj, përfshirë prezantimet që kërkohen sipas gërmës (c) Rubrika IV.

v Dokumentet duhet të dorëzohen në adresën e E-mail: [email protected] dhe fizikisht pranë Sekretari-Protokollit të Byrosë Kombëtare të Hetimit brenda datës 30 tetor 2025.

v Kujdes ! Sjellim në vëmendjen tuaj se formulari i aplikimit do të konsiderohet i plotë së bashku me fletën e inventarit. (Shtojca C formulari i aplikimit)

Pas përfundimit të fazës së parë të verifikimit paraprak, Komisioni harton listën me kandidatët e kualifikuar për të vazhduar procesin e konkurrimit, të cilët njoftohen nga Byroja Kombëtare e Hetimit, në formë shkresore dhe me e-mail, duke u caktuar edhe datën dhe orën e zhvillimit të fazës tjetër të konkurrimit.

Lista me kandidatët e kualifikuar në fazën e parë për oficerë të shërbimeve të policisë gjyqësore bëhet publike në website-in e BKH-së.

1.     Kandidatët e kualifikuar në fazën paraprake sipas listës së publikuar nga Komisioni i Përzgjedhjes, i nënshtrohen konkurrimit në fazën e dytë, atij të vlerësimit nëpërmjet testimit profesional.

2.     Për fillimin e fazës së dytë të konkurrimit, Komisioni nëpërmjet Byrosë Kombëtare të Hetimit, të paktën pesë ditë përpara, njofton kandidatët për orën, vendin dhe kohën se kur do të kryhet konkurrimi.

3.     Vlerësimi nëpërmjet testimit profesional kryhet nëpërmjet procesit të pikëzimit dhe përfshin:

§  vlerësimin e jetëshkrimit të kandidatit;

§  intervistën me gojë.

Totali i pikëve të vlerësimit të kandidatëve është 100 (njëqind) pikë, e cila përbëhet nga:

§ Jetëshkrimi i kandidatit, i cili vlerësohet me maksimumi 40 (dyzetë) pikë, duke ndjekur shkallët e pikëzimit si më poshtë:

ü Eksperiencën në punë – vlerësimi maksimal me 15 pikë;

ü Arsimimi përfshin diplomë pasuniversitare, njohuri, kualifikime të tjera dhe trajnime maksimumi 15 pikë;

ü Vlerësimet e mëparshme të punës maksimumi 10 pikë.

§ Intervista me gojë – vlerësimi maksimal me 60 pikë.

4.     Për t’u kualifikuar, kandidati duhet të marrë në total të paktën 70 (shtatëdhjetë) pikë.

5.     Pas përfundimit të vlerësimit dhe pikëzimit sa i përket jetëshkrimit të kandidatit, Komisioni fillon fazën tjetër të vlerësimit dhe pikëzimit nëpërmjet intervistës me gojë me kandidatin.

6.     Procesi i konkurrimit nëpërmjet intervistës me gojë me kandidatin ka për qëllim vlerësimin e njohurive, aftësive dhe formimin e kandidatëve dhe vlerësohet me maksimumi 60 pikë.

7.     Në përfundim të fazës së vlerësimit të intervistës me gojë të kandidatëve, Komisioni kryen llogaritjen e pikëve të marra nga secili kandidat, harton listën e kandidatëve duke bërë renditjen e tyre sipas totalit të pikëve, duke filluar nga kandidati me rezultatin më të lartë.

8.     Pas përfundimit të vlerësimit, kandidatët njoftohen nga Byroja Kombëtare e Hetimit në formë shkresore dhe me e-mail mbi rezultatin e vlerësimit.

Kandidatët do të vlerësohen në lidhje me:

a.      Njohuri mbi Kodin e Procedurës Penale;

b.     Njohuri mbi Kodin Penal;

c.      Njohuri mbi Ligjin Nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”, i ndryshuar;

d.     Njohuri mbi Ligjin nr. 25/2019 “Për organizimin dhe funksionimin e Policisë Gjyqësore”, si dhe akteve të tjera ligjore e nënligjore të fushës për të cilën konkurron.

e.      Akteve të tjera ligjore e nënligjore të fushës objekt i punës së pozicionit

Në përfundim të vlerësimit të kandidatëve, Byroja Kombëtare e Hetimit do të shpallë listën e fituesve në faqen zyrtare të saj.

Kandidatët që kanë kaluar me sukses procesin e vlerësimit do t’i nënshtrohen verifikimit të kushteve të sigurisë sipas parashikimeve në nenit 6 të ligjit nr. 95/2016.

Vetëm pas përfundimit të verifikimit të kushteve të sigurisë nga Komisioni i Posaçëm i Verifikimit të Pasurisë dhe Figurës së Kandidatëve, Drejtori i BKH-së do të emërojë në detyrë kandidatët e kualifikuar të cilët plotësojnë kushtet e sigurisë.